yaad hai aah ka wo rang-e-nawa ho jaana

yaad hai aah kā vo rañg-e-navā ho jaanā

yuuñ fazāoñ meñ simaTnā ki ghaTā ho jaanā

is qadar kaif ki madhosh-e-fazā ho jaanā

dekhnā saaz ko aur naġhma-sarā ho jaanā

husn kī fitrat-e-ma.asūm thī pāband-e-hijāb

ishq se siikh liyā jalva-numā ho jaanā

rasm-e-ādāb-o-mohabbat kā vo pāband kahāñ

jis kī taqdīr meñ ho nazr-e-vafā ho jaanā

husn ik ishq kī soī huī kaifiyyat hai

ishq hai husn kā bedār-e-vafā ho jaanā

na.ī zanjīr hai duniyā kā har ik hañgāma

asl meñ qaid hai zindāñ se rihā ho jaanā

mast-e-pindār sahī sāz-e-ḳhudī kyuuñ chheḌūñ

be-ḳhudī ko mirī aatā hai ḳhudā ho jaanā

yaad hai mujh ko vo gahvāra-e-zulmat kī fazā

itnā tārīkī meñ phir taaki 'ziyā' ho jaanā

yaad hai aah ka wo rang-e-nawa ho jaana

yun fazaon mein simaTna ki ghaTa ho jaana

is qadar kaif ki madhosh-e-faza ho jaana

dekhna saz ko aur naghma-sara ho jaana

husn ki fitrat-e-masum thi paband-e-hijab

ishq se sikh liya jalwa-numa ho jaana

rasm-e-adab-o-mohabbat ka wo paband kahan

jis ki taqdir mein ho nazr-e-wafa ho jaana

husn ek ishq ki soi hui kaifiyyat hai

ishq hai husn ka bedar-e-wafa ho jaana

nai zanjir hai duniya ka har ek hangama

asl mein qaid hai zindan se riha ho jaana

mast-e-pindar sahi saz-e-KHudi kyun chheDun

be-KHudi ko meri aata hai KHuda ho jaana

yaad hai mujh ko wo gahwara-e-zulmat ki faza

itna tariki mein phir taki 'ziya' ho jaana