yaad hai wo pur-kaif zamana hae mohabbat hae jawani

yaad hai vo pur-kaif zamāna haa.e mohabbat haa.e javānī

un kī kahānī merā fasāna haa.e mohabbat haa.e javānī

hijr meñ un ke chain na paanā raat ko aksar niiñd na aana

us pe sitam koyal kā tarāna haa.e mohabbat haa.e javānī

naqsh haiñ dil par un kī jafā.eñ raas na aa.iiñ mujh ko vafā.eñ

luT gayā saarā dil kā ḳhazāna haa.e mohabbat haa.e javānī

husn kī ārā.ish kā vo manzar aa.ine meñ aks-e-ruḳh-e-dilbar

dast-o-garebāñ kākul-o-shāna haa.e mohabbat haa.e javānī

is meñ base the rangīñ jalve sīmīñ jalve zarrīñ jalve

dil thā mirā ik ā.ina-ḳhāna haa.e mohabbat haa.e javānī

merā bulānā un kā na aanā un kā bulānā merā na jaanā

turfa-kashākash taaza bahāna haa.e mohabbat haa.e javānī

uf vo mire kāshāne meñ aksar shab ko tirā aana chhup-chhup kar

jām-ba-kaf aur zulf-ba-shāna haa.e mohabbat haa.e javānī

kyā kaheñ haal apne dil-o-jāñ kā vaqt-e-sahar vo shor azaañ kā

aur vo honā un kā ravāna haa.e mohabbat haa.e javānī

guzrī kahānī yaad phir aa.ī dil meñ 'valī' ik huuk sī uTThī

merī ġhazal hai dil kā tarāna haa.e mohabbat haa.e javānī

yaad hai wo pur-kaif zamana hae mohabbat hae jawani

un ki kahani mera fasana hae mohabbat hae jawani

hijr mein un ke chain na pana raat ko aksar nind na aana

us pe sitam koyal ka tarana hae mohabbat hae jawani

naqsh hain dil par un ki jafaen ras na aain mujh ko wafaen

luT gaya sara dil ka KHazana hae mohabbat hae jawani

husn ki aaraish ka wo manzar aaine mein aks-e-ruKH-e-dilbar

dast-o-gareban kakul-o-shana hae mohabbat hae jawani

is mein base the rangin jalwe simin jalwe zarrin jalwe

dil tha mera ek aaina-KHana hae mohabbat hae jawani

mera bulana un ka na aana un ka bulana mera na jaana

turfa-kashakash taza bahana hae mohabbat hae jawani

uf wo mere kashane mein aksar shab ko tera aana chhup-chhup kar

jam-ba-kaf aur zulf-ba-shana hae mohabbat hae jawani

kya kahen haal apne dil-o-jaan ka waqt-e-sahar wo shor azan ka

aur wo hona un ka rawana hae mohabbat hae jawani

guzri kahani yaad phir aai dil mein 'wali' ek huk si uTThi

meri ghazal hai dil ka tarana hae mohabbat hae jawani