یاد ہے وہ پر کیف زمانہ ہائے محبت ہائے جوانی

یاد ہے وہ پر کیف زمانہ ہائے محبت ہائے جوانی

ان کی کہانی میرا فسانہ ہائے محبت ہائے جوانی

ہجر میں ان کے چین نہ پانا رات کو اکثر نیند نہ آنا

اس پہ ستم کوئل کا ترانہ ہائے محبت ہائے جوانی

نقش ہیں دل پر ان کی جفائیں راس نہ آئیں مجھ کو وفائیں

لٹ گیا سارا دل کا خزانہ ہائے محبت ہائے جوانی

حسن کی آرائش کا وہ منظر آئنہ میں عکس رخ دلبر

دست و گریباں کاکل و شانہ ہائے محبت ہائے جوانی

اس میں بسے تھے رنگیں جلوے سیمیں جلوے زریں جلوے

دل تھا مرا اک آئنہ خانہ ہائے محبت ہائے جوانی

میرا بلانا ان کا نہ آنا ان کا بلانا میرا نہ جانا

طرفہ کشاکش تازہ بہانہ ہائے محبت ہائے جوانی

اف وہ مرے کاشانے میں اکثر شب کو ترا آنہ چھپ چھپ کر

جام بکف اور زلف بہ شانہ ہائے محبت ہائے جوانی

کیا کہیں حال اپنے دل و جاں کا وقت سحر وہ شور اذاں کا

اور وہ ہونا ان کا روانہ ہائے محبت ہائے جوانی

گزری کہانی یاد پھر آئی دل میں ولیؔ اک ہوک سی اٹھی

میری غزل ہے دل کا ترانہ ہائے محبت ہائے جوانی