yaad kar kar ke teri yaad miTane nikle

yaad kar kar ke tirī yaad miTāne nikle

le ke ghī haath meñ ham aag bujhāne nikle

ham faqīroñ ke qalam se jo ḳhazāne nikle

jholiyāñ le ke shahanshāh charāne nikle

jaise jangal meñ koī raat bitāne nikle

ghar se nikle to lagā jaan gañvāne nikle

apnī hālat kā ab ehsās huā hai aise

jaise chhappar koī barsāt meñ chhāne nikle

bhūkī dhartī kī anā aa ga.ī dāman meñ magar

saare ākāsh meñ do-chār hī daane nikle

kuchh thake-māñdoñ pe kuttoñ kā barasnā dekhā

jab vo fōtpath pe aḳhbār bichhāne nikle

ḳhud ko samjhāte hue shahr se yuuñ lauTe haiñ

jaise pardes koī ghar se kamāne nikle

aise insāñ se mulāqāt na karnā behtar

dil ke āñgan meñ jo dīvār uThāne nikle

saade logoñ ko bahut tang kiyā hai tū ne

ham hī dīvānoñ se bal tere zamāne nikle

sher kahte haiñ jise baat vahīñ ḳhatm huī

ham to bas 'mīr' kī ik rasm nibhāne nikle

yaad kar kar ke teri yaad miTane nikle

le ke ghi hath mein hum aag bujhane nikle

hum faqiron ke qalam se jo KHazane nikle

jholiyan le ke shahanshah charane nikle

jaise jangal mein koi raat bitane nikle

ghar se nikle to laga jaan ganwane nikle

apni haalat ka ab ehsas hua hai aise

jaise chhappar koi barsat mein chhane nikle

bhuki dharti ki ana aa gai daman mein magar

sare aakash mein do-chaar hi dane nikle

kuchh thake-mandon pe kutton ka barasna dekha

jab wo footpath pe aKHbar bichhane nikle

KHud ko samjhate hue shahr se yun lauTe hain

jaise pardes koi ghar se kamane nikle

aise insan se mulaqat na karna behtar

dil ke aangan mein jo diwar uThane nikle

sade logon ko bahut tang kiya hai tu ne

hum hi diwanon se bal tere zamane nikle

sher kahte hain jise baat wahin KHatm hui

hum to bas 'mir' ki ek rasm nibhane nikle