yaad kar ke tu gae waqt ko rota hoga

yaad kar ke tū ga.e vaqt ko rotā hogā

chāñd jab jab tire āñgan meñ utartā hogā

yūñhī murjhā se ga.e hoñge mahakte gajre

jaane vaalā na magar lauT ke aaya hogā

jo mirā naam bhī letā thā duāoñ kī tarah

sochtī huuñ mujhe kis taur se bhūlā hogā

chāñd har ghar meñ yahī hogā magar us ke sabab

hañs paḌā hogā koī aur koī royā hogā

koī girya bhī na mahrūm-e-tamannā na kiyā

hausla vaqt ne kyā kyā na sikhāyā hogā

jab mire haath the roī huī nam āñkhoñ par

us ne jaate hue muḌ kar mujhe dekhā hogā

mushk-bār aa.ī hai yādoñ ke darīche se havā

koī guzrā huā lamha kahīñ mahkā hogā

yaad kar ke tu gae waqt ko rota hoga

chand jab jab tere aangan mein utarta hoga

yunhi murjha se gae honge mahakte gajre

jaane wala na magar lauT ke aaya hoga

jo mera nam bhi leta tha duaon ki tarah

sochti hun mujhe kis taur se bhula hoga

chand har ghar mein yahi hoga magar us ke sabab

hans paDa hoga koi aur koi roya hoga

koi girya bhi na mahrum-e-tamanna na kiya

hausla waqt ne kya kya na sikhaya hoga

jab mere hath the roi hui nam aankhon par

us ne jate hue muD kar mujhe dekha hoga

mushk-bar aai hai yaadon ke dariche se hawa

koi guzra hua lamha kahin mahka hoga