yaad ke be-rang zaKHmon ko lahu mil jaega

yaad ke be-rang zaḳhmoñ ko lahū mil jā.egā

dard kā mausam to aane do chaman khil jā.egā

ārzūoñ ke safar kī intihā hotī nahīñ

har na.ī manzil pe ik rasta nayā mil jā.egā

rahguzār-e-shauq meñ dil ke taqāze kuchh bhī hoñ

kārvān-e-zindagī manzil-ba-manzil jā.egā

dil sulagtā hai to dāman tak pahuñch jaatī hai aañch

jab kabhī tūfāñ uThegā sū-e-sāhil jā.egā

jis dayār-e-shauq kā thā aasrā vo miT gayā

ab kahāñ le kar mujhe ai jazba-e-dil jā.egā

terā kūcha ho ki maqtal ham ko is kī fikr kyā

ham usī jānib chaleñge jis taraf dil jā.egā

ehtimām-e-raqs-e-dīvāna to hai par sochiye

ḳhvāb-gāh-e-nāz tak shor-e-salāsil jā.egā

ho rahī hai bazm meñ 'shāriq' masīhā.ī kī baat

zaḳhm bhī bhar jā.eñge aur chaak bhī sil jā.egā

yaad ke be-rang zaKHmon ko lahu mil jaega

dard ka mausam to aane do chaman khil jaega

aarzuon ke safar ki intiha hoti nahin

har nai manzil pe ek rasta naya mil jaega

rahguzar-e-shauq mein dil ke taqaze kuchh bhi hon

karwan-e-zindagi manzil-ba-manzil jaega

dil sulagta hai to daman tak pahunch jati hai aanch

jab kabhi tufan uThega su-e-sahil jaega

jis dayar-e-shauq ka tha aasra wo miT gaya

ab kahan le kar mujhe ai jazba-e-dil jaega

tera kucha ho ki maqtal hum ko is ki fikr kya

hum usi jaanib chalenge jis taraf dil jaega

ehtimam-e-raqs-e-diwana to hai par sochiye

KHwab-gah-e-naz tak shor-e-salasil jaega

ho rahi hai bazm mein 'shaariq' masihai ki baat

zaKHm bhi bhar jaenge aur chaak bhi sil jaega