yaad ke tyauhaar mein wasl-o-wafa sab chahiye

yaad ke tyauhār meñ vasl-o-vafā sab chāhiye

raat ke resham meñ lipTī aap kī chhab chāhiye

phir halāvat se chhalakte jaam ḳhālī ho ga.e

phir ġhazal ko aap kī shīrīnī-e-lab chāhiye

raat kī vaadī meñ saarī raunaqeñ ābād haiñ

din ke vīrāne meñ bhī ik gulshan-e-shab chāhiye

soch aur alfāz kī bechainiyoñ meñ kuchh bhī ho

baat kī tah se nikaltā saaf matlab chāhiye

raushnī kī jabr ne āñkhoñ ko ḳhīra kar diyā

ab basārat ke liye kuchh zulmat-e-shab chāhiye

rasm kī yaksāniyat niyyat kā parda ban ga.ī

jo munāfiq kā na ho aisā bhī maz.hab chāhiye

apne ġham kī uljhaneñ suljhāoge kab tak 'munīr'

dard ālam-gīr ho jaa.e yahī ab chāhiye

yaad ke tyauhaar mein wasl-o-wafa sab chahiye

raat ke resham mein lipTi aap ki chhab chahiye

phir halawat se chhalakte jam KHali ho gae

phir ghazal ko aap ki shirini-e-lab chahiye

raat ki wadi mein sari raunaqen aabaad hain

din ke virane mein bhi ek gulshan-e-shab chahiye

soch aur alfaz ki bechainiyon mein kuchh bhi ho

baat ki tah se nikalta saf matlab chahiye

raushni ki jabr ne aankhon ko KHira kar diya

ab basarat ke liye kuchh zulmat-e-shab chahiye

rasm ki yaksaniyat niyyat ka parda ban gai

jo munafiq ka na ho aisa bhi mazhab chahiye

apne gham ki uljhanen suljhaoge kab tak 'munir'

dard aalam-gir ho jae yahi ab chahiye