yaad mein teri kab bhala sham se dil jala nahin

yaad meñ terī kab bhalā shaam se dil jalā nahīñ

is ke sivā hayāt meñ kaam koī rahā nahīñ

lagtā hai tum ko dekh ke ruk sī ga.ī haiñ gardisheñ

varna yahāñ to do qadam chalne kā rāsta nahīñ

jaane vo ajnabī mujhe apnā shanāsā kyuuñ lagā

jab ki hamāre darmiyāñ koī bhī rābta nahīñ

shām-e-qafas na pūchhiye kaisī qayāmateñ rahīñ

TūTīñ bahut sī tīliyāñ qaidī magar uḌā nahīñ

rāhguzār-e-shauq meñ duur talak ġhubār hai

kaise uThā.ūñ maiñ qadam kuchh bhī to sūjhtā nahīñ

merā vajūd be-sadā lafzoñ meñ kaise Dhal gayā

tum ne to ḳhair kah diyā merī koī ḳhatā nahīñ

laa.ī mujhe kahāñ talak dekhiye merī be-ḳhudī

aaj mujhe yaqīñ huā aam ye rāsta nahīñ

yaad mein teri kab bhala sham se dil jala nahin

is ke siwa hayat mein kaam koi raha nahin

lagta hai tum ko dekh ke ruk si gai hain gardishen

warna yahan to do qadam chalne ka rasta nahin

jaane wo ajnabi mujhe apna shanasa kyun laga

jab ki hamare darmiyan koi bhi rabta nahin

sham-e-qafas na puchhiye kaisi qayamaten rahin

TuTin bahut si tiliyan qaidi magar uDa nahin

rahguzar-e-shauq mein dur talak ghubar hai

kaise uThaun main qadam kuchh bhi to sujhta nahin

mera wajud be-sada lafzon mein kaise Dhal gaya

tum ne to KHair kah diya meri koi KHata nahin

lai mujhe kahan talak dekhiye meri be-KHudi

aaj mujhe yaqin hua aam ye rasta nahin