یاد میں ان کی مری آنکھ سے برسات ہوئی

یاد میں ان کی مری آنکھ سے برسات ہوئی

ایک ہی لمحہ میں دو بار یہ سوغات ہوئی

عشق ظاہر کروں میں اس سے تو کس طرح کروں

بس یہی سوچ کے شرمندہ مری ذات ہوئی

دن تو یاروں میں گزر ہی گیا جیسے تیسے

درد کچھ اور بڑھا ہجر میں جب رات ہوئی

شب سنہری ہوئی غم میرے خوشی میں بدلے

حسن جاناں سے مری جب بھی ملاقات ہوئی

دونوں اک ترک تعلق کی سزا یہ پائے

اس کی ڈولی نہ اٹھی میری نہ بارات ہوئی

پھوٹ کر رونے لگا دیکھ کے وہ میری طرف

آخری وقت میں جب اس سے مری بات ہوئی

جذبۂ عشق نے منہاجؔ یوں دم توڑ دیا

ذہن کو جیت ہوئی دل کو مگر مات ہوئی