yaad mein unki meri aankh se barsat hui

yaad meñ un kī mirī aañkh se barsāt huī

ek hī lamhe meñ do baar ye sauġhāt huī

'ishq zāhir karūñ maiñ us se to kis tarh karūñ

bas yahī soch ke sharminda mirī zaat huī

din to yāroñ meñ guzar hī gayā jaise taise

dard kuchh aur baḌhā hijr meñ jab raat huī

shab sunahrī huī ġham mere ḳhushī meñ badle

husn-e-jānāñ se mirī jab bhī mulāqāt huī

donoñ ik tark-e-ta'alluq kī sazā ye paa.e

us kī Dolī na uThī merī na bārāt huī

phuuT kar rone lagā dekh ke vo merī taraf

āḳhirī vaqt meñ jab us se mirī baat huī

jazba-e-'ishq ne 'minhāj' yuuñ dam toḌ diyā

zehn ko jiit huī dil ko magar maat huī

yaad mein un ki meri aankh se barsat hui

ek hi lamhe mein do bar ye saughat hui

'ishq zahir karun main us se to kis tarh karun

bas yahi soch ke sharminda meri zat hui

din to yaron mein guzar hi gaya jaise taise

dard kuchh aur baDha hijr mein jab raat hui

shab sunahri hui gham mere KHushi mein badle

husn-e-jaanan se meri jab bhi mulaqat hui

donon ek tark-e-ta'alluq ki saza ye pae

us ki Doli na uThi meri na baraat hui

phuT kar rone laga dekh ke wo meri taraf

aaKHiri waqt mein jab us se meri baat hui

jazba-e-'ishq ne 'minhaj' yun dam toD diya

zehn ko jit hui dil ko magar mat hui