یاد نے تیری کچھ اتنا کر دیا کاہل مجھے

یاد نے تیری کچھ اتنا کر دیا کاہل مجھے

کار دنیا سے سبھی کہنے لگے غافل مجھے

یہ حقیقت کا جہاں تو راس اب آتا نہیں

آ کبھی تو پاس آ خوابوں میں آ کے مل مجھے

لوگ کہتے تھے کبھی تو بے وفا ہو جائے گا

یاد آتا ہے تری آنکھوں میں کالا تل مجھے

ایک تیرے اسم کو کاغذ پہ میں لکھتی رہوں

پھر بھلے سارا جہاں کہتا رہے جاہل مجھے

ہر خوشی ہر غم میں تیرے میرا بھی تو حصہ ہے

وصل میں جب ساتھ ہیں کر ہجر میں شامل مجھے

کون جانے کون ہے معشوق عاشق کون ہے

آپ کو میں نے بنایا آپ نے بسمل مجھے