yaad teri bhula raha hun main

yaad terī bhulā rahā huuñ maiñ

ik nayā giit gā rahā huuñ maiñ

jo tire saath hī chalī ga.ī thī

us ghaḌī ko bulā rahā huuñ maiñ

aa.ine meñ kahāñ hai aks tirā

umr bhar DhūñDhtā rahā huuñ maiñ

ye samundar hai Dūbne ke liye

phir bhī naav banā rahā huuñ maiñ

kyoñ dhaḌakne lagā hai terā dil

haal apnā batā rahā huuñ maiñ

raunaq-e-bazm-e-shauq yaad nahīñ

hijr meñ mubtalā rahā huuñ maiñ

sādgī khīñchtī hai apnī taraf

rang meñ Duubā jā rahā huuñ maiñ

laakh ahl-e-hunar se duur sahī

ishq se faiz pā rahā huuñ maiñ

ḳhvāb bujhne lage haiñ āñkhoñ meñ

raat bhar jāgtā rahā huuñ maiñ

is zamīñ kī niyāz-mandī meñ

āsmāñ ko jhukā rahā huuñ maiñ

ik na.ī zindagī ke siine meñ

ik nayā dil banā rahā huuñ maiñ

ik purāne junūñ ke malbe par

aql kā ghar basā rahā huuñ maiñ

yaad teri bhula raha hun main

ek naya git ga raha hun main

jo tere sath hi chali gai thi

us ghaDi ko bula raha hun main

aaine mein kahan hai aks tera

umr bhar DhunDhta raha hun main

ye samundar hai Dubne ke liye

phir bhi naw bana raha hun main

kyon dhaDakne laga hai tera dil

haal apna bata raha hun main

raunaq-e-bazm-e-shauq yaad nahin

hijr mein mubtala raha hun main

sadgi khinchti hai apni taraf

rang mein Duba ja raha hun main

lakh ahl-e-hunar se dur sahi

ishq se faiz pa raha hun main

KHwab bujhne lage hain aankhon mein

raat bhar jagta raha hun main

is zamin ki niyaz-mandi mein

aasman ko jhuka raha hun main

ek nai zindagi ke sine mein

ek naya dil bana raha hun main

ek purane junun ke malbe par

aql ka ghar basa raha hun main