yaad teri jo kabhi aati hai bahlane ko

yaad terī jo kabhī aatī hai bahlāne ko

aur dīvāna banā jaatī hai dīvāne ko

tum mohabbat-bharī nazroñ se use dekh to lo

niiñd kāñToñ pe bhī aa jaatī hai dīvāne ko

ham batā.eñge tumheñ shāna-o-gesū ke rumūz

ḳhatm kar lo haram-o-dair ke afsāne ko

us ko mahfil meñ jo dekhā tapish-e-ġham kā sharīk

le liyā sham.a ne āġhosh meñ parvāne ko

bāda-kash vā.iz-e-kaj-fahm se kyā bahs kareñ

us ne dekhā hai bahut duur se maiḳhāne ko

aap zulf apnī sañvārā kiye aur duniyā ne

aap se chhīn liyā aap ke dīvāne ko

jab na 'ehsān' rahegā na kahānī us kī

aap dohrā.eñge 'ehsān' ke afsāne ko

yaad teri jo kabhi aati hai bahlane ko

aur diwana bana jati hai diwane ko

tum mohabbat-bhari nazron se use dekh to lo

nind kanTon pe bhi aa jati hai diwane ko

hum bataenge tumhein shana-o-gesu ke rumuz

KHatm kar lo haram-o-dair ke afsane ko

us ko mahfil mein jo dekha tapish-e-gham ka sharik

le liya shama ne aaghosh mein parwane ko

baada-kash waiz-e-kaj-fahm se kya bahs karen

us ne dekha hai bahut dur se maiKHane ko

aap zulf apni sanwara kiye aur duniya ne

aap se chhin liya aap ke diwane ko

jab na 'ehsan' rahega na kahani us ki

aap dohraenge 'ehsan' ke afsane ko