yaad ulfat ki kahani hai alif se ye tak

yaad ulfat kī kahānī hai alif se ye tak

ye tujhe aaj sunānī hai alif se ye tak

tujh ko ik baat batānī hai alif se ye tak

dūsrī baat chhupānī hai alif se ye tak

tirā chehra faqat ik chehra nahīñ hai mire dost

ek dariyā-e-ma.ānī hai alif se ye tak

dekh kar ḳhāna-ba-doshoñ ko yahī samjhā huuñ

zindagī naql-e-makānī hai alif se ye tak

zindagī kyā hai jo pūchhā to kahā āñkhoñ ne

zindagī ashk-fishānī hai alif se ye tak

koī novel koī theatre koī afsāna nahīñ

ziist ik sachchī kahānī hai alif se ye tak

mānñā hogī mirī baat bhī tujh ko pyāre

tirī har baat jo maanī hai alif se ye tak

thak chukā huuñ maiñ mohabbat kī kitābeñ paḌh kar

ab unheñ aag lagānī hai alif se ye tak

sun ke ye taaza ġhazal mujh se vo ik dam bolā

ye ġhazal terī purānī hai alif se ye tak

reg-e-sahrā pe ye likkhā hai kisī ne 'nūrī'

zindagī tishna-dahānī hai alif se ye tak

yaad ulfat ki kahani hai alif se ye tak

ye tujhe aaj sunani hai alif se ye tak

tujh ko ek baat batani hai alif se ye tak

dusri baat chhupani hai alif se ye tak

tera chehra faqat ek chehra nahin hai mere dost

ek dariya-e-maani hai alif se ye tak

dekh kar KHana-ba-doshon ko yahi samjha hun

zindagi naql-e-makani hai alif se ye tak

zindagi kya hai jo puchha to kaha aankhon ne

zindagi ashk-fishani hai alif se ye tak

koi nowel koi theatre koi afsana nahin

zist ek sachchi kahani hai alif se ye tak

manna hogi meri baat bhi tujh ko pyare

teri har baat jo mani hai alif se ye tak

thak chuka hun main mohabbat ki kitaben paDh kar

ab unhen aag lagani hai alif se ye tak

sun ke ye taza ghazal mujh se wo ek dam bola

ye ghazal teri purani hai alif se ye tak

reg-e-sahra pe ye likkha hai kisi ne 'nuri'

zindagi tishna-dahani hai alif se ye tak