yaad unki dushman-e-aram ho kar rah gai

yaad un kī dushman-e-ārām ho kar rah ga.ī

be-qarārī ishq kā in.aam ho kar rah ga.ī

ziist apnī kushta-e-ālām ho kar rah ga.ī

haañ rahīn-e-gardish-e-ayyām ho kar rah ga.ī

har qadam par ham na.ī uljhan meñ phañs kar rah ga.e

zindagānī ik musalsal daam ho kar rah ga.ī

zindagī meñ ho sakā na ham ko ehsās-e-ḳhushī

zindagī apnī shikasta jaam ho kar rah ga.ī

talḳhiyāñ maazī kī kuchh yuuñ zehn par chhā.ī rahīñ

ishrat-e-nau ik ḳhayāl-e-ḳhām ho kar rah ga.ī

har nayā din saath laayā kuchh na.ī māyūsiyāñ

har sahar apne liye to shaam ho kar rah ga.ī

ho gayā dil par tasallut is tarah ālām kā

har ḳhushī āḳhir barā.e-nām ho kar rah ga.ī

dard-o-ranj-o-ġham sharīk-e-zindagī the har tarah

maut āḳhir muft meñ badnām ho kar rah ga.ī

dil-lagī āġhāz-e-ulfat hai ye maanā ham-nashīñ

aur agar dil kī lagī anjām ho kar rah ga.ī

ishq kā e.azāz pahle thā kisī ko hī nasīb

ab ye tohmat har kisī ke naam ho kar rah ga.ī

shaiḳh sāhab aap se kam-zarf logoñ ke tufail

mai-parastī dahr meñ badnām ho kar rah ga.ī

ġham zamāne-bhar ke sab hisse meñ mere aa ga.e

har ḳhushī duniyā kī un ke naam ho kar rah ga.ī

maiñ to mar kar bhī unheñ ai 'sehr' kar paayā na ḳhush

koshish-e-āḳhir bhī ye nākām ho kar rah ga.ī

yaad un ki dushman-e-aram ho kar rah gai

be-qarari ishq ka inam ho kar rah gai

zist apni kushta-e-alam ho kar rah gai

han rahin-e-gardish-e-ayyam ho kar rah gai

har qadam par hum nai uljhan mein phans kar rah gae

zindagani ek musalsal dam ho kar rah gai

zindagi mein ho saka na hum ko ehsas-e-KHushi

zindagi apni shikasta jam ho kar rah gai

talKHiyan mazi ki kuchh yun zehn par chhai rahin

ishrat-e-nau ek KHayal-e-KHam ho kar rah gai

har naya din sath laya kuchh nai mayusiyan

har sahar apne liye to sham ho kar rah gai

ho gaya dil par tasallut is tarah aalam ka

har KHushi aaKHir barae-nam ho kar rah gai

dard-o-ranj-o-gham sharik-e-zindagi the har tarah

maut aaKHir muft mein badnam ho kar rah gai

dil-lagi aaghaz-e-ulfat hai ye mana ham-nashin

aur agar dil ki lagi anjam ho kar rah gai

ishq ka eazaz pahle tha kisi ko hi nasib

ab ye tohmat har kisi ke nam ho kar rah gai

shaiKH sahab aap se kam-zarf logon ke tufail

mai-parasti dahr mein badnam ho kar rah gai

gham zamane-bhar ke sab hisse mein mere aa gae

har KHushi duniya ki un ke nam ho kar rah gai

main to mar kar bhi unhen ai 'sehr' kar paya na KHush

koshish-e-aKHir bhi ye nakaam ho kar rah gai