yaad uski hai bahut ji mera bahlane ko

yaad us kī hai bahut jī mirā bahlāne ko

jis ne afsāna banāyā mire afsāne ko

shaam se sub.h huī sub.h se phir shaam huī

dil ne jab chheḌ diyā dard ke afsāne ko

aa ga.ī yaad kisī kī nigah-e-mast mujhe

abhī hoñToñ se lagāyā hī thā paimāne ko

ab na sāġhar kī havas hai na tamannā-e-bahār

tere dāman kī havā mil ga.ī dīvāne ko

lazzat-e-tishna-labī yaad jo aa.ī 'shāriq'

rakh diyā maiñ ne uThā kar vahīñ paimāne ko

yaad us ki hai bahut ji mera bahlane ko

jis ne afsana banaya mere afsane ko

sham se subh hui subh se phir sham hui

dil ne jab chheD diya dard ke afsane ko

aa gai yaad kisi ki nigah-e-mast mujhe

abhi honTon se lagaya hi tha paimane ko

ab na saghar ki hawas hai na tamanna-e-bahaar

tere daman ki hawa mil gai diwane ko

lazzat-e-tishna-labi yaad jo aai 'shaariq'

rakh diya main ne uTha kar wahin paimane ko