یاد اس مۂ خوبی کی جب ہجر کی رات آئی

یاد اس مۂ خوبی کی جب ہجر کی رات آئی

آنکھوں میں مری اس دم اشکوں کی برات آئی

دل عشق کی لذت سے آگاہ ہوا جب سے

جیسے تن مردہ میں اک تازہ حیات آئی

تھا دل میں ارادہ تو شکوؤں کا شکایت کا

جب سامنے وہ آئے ہونٹوں پہ نہ بات آئی

تلخی کلام اس کی عاشق کی سماعت تک

شیرینی و لذت میں مانند ثبات آئی

اس خاک میں ملنے کو خود خاک ہوا آخر

خاک اس کے قدم کی جب دیوانے کے ہاتھ آئی

اس تابش جلوہ سے نظریں جو ہوئیں خیرہ

پھر سامنے آنکھوں کے پہلی سی قنات آئی

خلوت ہے شب غم کی اور مشق تصور ہے

تم سے گلے ملنے کی پھر آج یہ رات آئی

مائل بہ کرم اس کو پایا جو فضاؔ اک دن

جو دل میں تھی مدت سے ہونٹوں پہ وہ بات آئی