yaad us mah-e-KHubi ki jab hijr ki raat aai

yaad us mah-e-ḳhūbī kī jab hijr kī raat aa.ī

āñkhoñ meñ mirī us dam ashkoñ kī barāt aa.ī

dil ishq kī lazzat se āgāh huā jab se

jaise tan-e-murda meñ ik taaza hayāt aa.ī

thā dil meñ irāda to shikvoñ kā shikāyat kā

jab sāmne vo aa.e hoñToñ pe na baat aa.ī

talḳhi-e-kalām us kī āshiq kī samā.at tak

shīrīnī-o-lazzat meñ mānind-e-sabāt aa.ī

is ḳhaak meñ milne ko ḳhud ḳhaak huā āḳhir

ḳhaak us ke qadam kī jab dīvāne ke haath aa.ī

is tābish-e-jalva se nazreñ jo huiiñ ḳhīra

phir sāmne āñkhoñ ke pahlī sī qanāt aa.ī

ḳhalvat hai shab-e-ġham kī aur mashq-e-tasavvur hai

tum se gale milne kī phir aaj ye raat aa.ī

mā.il-ba-karam us ko paayā jo 'fazā' ik din

jo dil meñ thī muddat se hoñToñ pe vo baat aa.ī

yaad us mah-e-KHubi ki jab hijr ki raat aai

aankhon mein meri us dam ashkon ki baraat aai

dil ishq ki lazzat se aagah hua jab se

jaise tan-e-murda mein ek taza hayat aai

tha dil mein irada to shikwon ka shikayat ka

jab samne wo aae honTon pe na baat aai

talKHi-e-kalam us ki aashiq ki samaat tak

shirini-o-lazzat mein manind-e-sabaat aai

is KHak mein milne ko KHud KHak hua aaKHir

KHak us ke qadam ki jab diwane ke hath aai

is tabish-e-jalwa se nazren jo huin KHira

phir samne aankhon ke pahli si qanat aai

KHalwat hai shab-e-gham ki aur mashq-e-tasawwur hai

tum se gale milne ki phir aaj ye raat aai

mail-ba-karam us ko paya jo 'faza' ek din

jo dil mein thi muddat se honTon pe wo baat aai