yaaden chalen KHayal chala ashk-e-tar chale

yādeñ chaleñ ḳhayāl chalā ashk-e-tar chale

le kar payām-e-shauq ka.ī nāma-bar chale

dil ko sambhālte rahe har hādse ye ham

ab kyā kareñ ki ḳhud tire gesū bikhar chale

har gaam par shikast ne yuuñ hausla diyā

jis tarah saath saath koī ham-safar chale

shauq-e-talab na ho koī bāñg-e-jaras to ho

āḳhir koī chale to kis ummīd par chale

ab kyā karoge sair-e-saman-zār-e-ārzū

rut jā chukī chaḌhe hue dariyā utar chale

rāhoñ meñ 'hosh' sañg baraste haiñ har taraf

le kar ye kārvān-e-tamannā kidhar chale

yaaden chalen KHayal chala ashk-e-tar chale

le kar payam-e-shauq kai nama-bar chale

dil ko sambhaalte rahe har hadse ye hum

ab kya karen ki KHud tere gesu bikhar chale

har gam par shikast ne yun hausla diya

jis tarah sath sath koi ham-safar chale

shauq-e-talab na ho koi bang-e-jaras to ho

aaKHir koi chale to kis ummid par chale

ab kya karoge sair-e-saman-zar-e-arzu

rut ja chuki chaDhe hue dariya utar chale

rahon mein 'hosh' sang baraste hain har taraf

le kar ye karwan-e-tamanna kidhar chale