یادیں ہیں شب غم ہے اور اشک فشانی ہے

یادیں ہیں شب غم ہے اور اشک فشانی ہے

سن اے دل دیوانہ تیری یہ کہانی ہے

کشتی کا بڑھاپا ہے طوفاں کی جوانی ہے

پی لیں گے سمندر کو ہم نے بھی یہ ٹھانی ہے

اے جذبۂ صادق تو فانوس محبت ہے

جو گل نہ ہو آندھی سے وہ شمع جلانی ہے

بس ایک محبت ہے جس کو ہے بقا ورنہ

اس عالم فانی میں جو چیز ہے فانی ہے

حسن رخ دنیا کا ہر دل پہ اثر دیکھا

آئینے بدلتے ہیں تصویر پرانی ہے

لفظوں کو محب دے دے دھڑکن دل مخزن کی

محفل میں غزل اپنی ان کو جو سنانی ہے