yaadon ki gunj zehn se bahar nikaliye

yādoñ kī guuñj zehn se bāhar nikāliye

gumbad na chīḳh uTThe koī dar nikāliye

khul jā.iye baraste hue abr kī tarah

jo chiiz dil meñ hai use bāhar nikāliye

ban kar dikhā.iye kisī bahzād kā javāb

patthar tarāsh kar koī paikar nikāliye

rakhiye shanāvarī kā bharam kuchh na kuchh zarūr

motī na haath aa.e to patthar nikāliye

manzūr hai ġhurūr-e-ḳhizāñ kī agar shikast

gulshan se rañg-o-nūr ke lashkar nikāliye

qādir hai bahr-o-bar pe jo insāñ to aap bhī

ḳhat khīñch kar zamīñ se samundar nikāliye

rakhiye ba-azm-e-ḳhās rah-e-zīst meñ qadam

manzil baḌī kaThin hai magar Dar nikāliye

dushman bhī tiir joḌ ke baiThā hai ghaat meñ

ḳhandaq se dekh-bhāl ke ab sar nikāliye

phir dost ko lagā.iye dil se ba-sad-ḳhulūs

phir apnī āstīn se ḳhanjar nikāliye

phir chhā rahī hai dajla-e-mahtāb par ghaTā

is tīrgī se phir koī manzar nikāliye

jo ho sake to vaqt kī zanjīr toḌ kar

shām-o-sahar kā paañv se chakkar nikāliye

'zulfī' galī meñ aaj bahut tez hai havā

is kāġhzī-badan ko na bāhar nikāliye

yaadon ki gunj zehn se bahar nikaliye

gumbad na chiKH uTThe koi dar nikaliye

khul jaiye baraste hue abr ki tarah

jo chiz dil mein hai use bahar nikaliye

ban kar dikhaiye kisi bahzad ka jawab

patthar tarash kar koi paikar nikaliye

rakhiye shanawari ka bharam kuchh na kuchh zarur

moti na hath aae to patthar nikaliye

manzur hai ghurur-e-KHizan ki agar shikast

gulshan se rang-o-nur ke lashkar nikaliye

qadir hai bahr-o-bar pe jo insan to aap bhi

KHat khinch kar zamin se samundar nikaliye

rakhiye ba-azm-e-KHas rah-e-zist mein qadam

manzil baDi kaThin hai magar Dar nikaliye

dushman bhi tir joD ke baiTha hai ghat mein

KHandaq se dekh-bhaal ke ab sar nikaliye

phir dost ko lagaiye dil se ba-sad-KHulus

phir apni aastin se KHanjar nikaliye

phir chha rahi hai dajla-e-mahtab par ghaTa

is tirgi se phir koi manzar nikaliye

jo ho sake to waqt ki zanjir toD kar

sham-o-sahar ka panw se chakkar nikaliye

'zulfi' gali mein aaj bahut tez hai hawa

is kaghzi-badan ko na bahar nikaliye