yaadon mein rang bhar raha hun

yādoñ meñ rang bhar rahā huuñ

zaḳhmoñ ko gulāb kar rahā huuñ

har saañs ek an-sunī sī aahaT

maiñ jaane kis pe mar rahā huuñ

duniyā.eñ vajūd pā rahī haiñ

reza reza bikhar rahā huuñ

ik lamha-e-gum-shuda kī ḳhātir

sadiyoñ kā hisāb kar rahā huuñ

maqsūd-e-safar hai kuchh to aisā

sho'loñ se jo guzar rahā huuñ

hai ek junūn-e-ḳhud-shanāsī

aksar apne hī sar rahā huuñ

tūfān guzar chukā hai kab kā

ab dariyā sā utar rahā huuñ

rishte mazbūt ho rahe haiñ

peshāniyoñ par ubhar rahā huuñ

thā faḳhr bahut falak-rasī par

ḳhud apne par ab katar rahā huuñ

yaadon mein rang bhar raha hun

zaKHmon ko gulab kar raha hun

har sans ek an-suni si aahaT

main jaane kis pe mar raha hun

duniyaen wajud pa rahi hain

reza reza bikhar raha hun

ek lamha-e-gum-shuda ki KHatir

sadiyon ka hisab kar raha hun

maqsud-e-safar hai kuchh to aisa

sho'lon se jo guzar raha hun

hai ek junun-e-KHud-shanasi

aksar apne hi sar raha hun

tufan guzar chuka hai kab ka

ab dariya sa utar raha hun

rishte mazbut ho rahe hain

peshaniyon par ubhar raha hun

tha faKHr bahut falak-rasi par

KHud apne par ab katar raha hun