یادوں میں اس کی یاد ڈھلے اور دیا جلے

یادوں میں اس کی یاد ڈھلے اور دیا جلے

یہ رات جگمگاتی چلے اور دیا جلے

روشن ہے کل جہاں مرا اس کے خیال سے

سورج ڈھلے تو چاند چلے اور دیا جلے

یہ روشنی کی بیل ہمیشہ ہری رہے

ہر شاخ اس کی پھولے پھلے اور دیا جلے

دل کو ہے انتظار کہ اب دھرتی آسماں

اک دوجے کو لگائیں گلے اور دیا جلے

برسے وہ چاندنی کی طرح ایسے ٹوٹ کر

تاریکی اپنے ہاتھ ملے اور دیا جلے

میں چاہتا ہوں وہ بھی مجھے ایسے آزمائے

طوفان آئے آندھی چلے اور دیا جلے

یوں زندگی کی شام ڈھلے دور دشت میں

لیٹے ہوں سبز پیڑ تلے اور دیا جلے