yan KHak ka bistar hai gale mein kafni hai

yaañ ḳhaak kā bistar hai gale meñ kafnī hai

vaañ haath meñ ā.īna hai gul pairahanī hai

hāthoñ se hameñ ishq ke din raat nahīñ chain

fariyād o fuġhāñ din ko hai shab nāra-zanī hai

hushyār ho ġhaflat se tū ġhāfil na ho ai dil

apnī to nazar meñ ye jagah be-vatanī hai

kuchh kah nahīñ saktā huuñ zabāñ se ki zarā dekh

kyā jaa.e hai jis jaa.e na kuchh dam-zadanī hai

mizhgāñ pe mire laḳht-e-jigar hī nahīñ yaaro

is taar se vo rishta aqīq-e-yamanī hai

likh aur ġhazal qāfiye ko pher 'zafar' tū

ab tab.a kī dariyā kī tirī mauj-zanī hai

yan KHak ka bistar hai gale mein kafni hai

wan hath mein aaina hai gul pairahani hai

hathon se hamein ishq ke din raat nahin chain

fariyaad o fughan din ko hai shab nara-zani hai

hushyar ho ghaflat se tu ghafil na ho ai dil

apni to nazar mein ye jagah be-watani hai

kuchh kah nahin sakta hun zaban se ki zara dekh

kya jae hai jis jae na kuchh dam-zadani hai

mizhgan pe mere laKHt-e-jigar hi nahin yaro

is tar se wo rishta aqiq-e-yamani hai

likh aur ghazal qafiye ko pher 'zafar' tu

ab taba ki dariya ki teri mauj-zani hai