yan se paigham jo le kar gae maqul gae

yaañ se paiġhām jo le kar ga.e ma.aqūl ga.e

us kī bātoñ meñ lage aise ki sab bhuul ga.e

tū to ma.ashūq hai tujh ko to bahut āshiq haiñ

ġham unhoñ kā hai jo vo jaan se nirmūl ga.e

be-kalī apnī kā iz.hār to kartā nahīñ maiñ

gul-ruḳhāñ dekh ke tum mujh ko abas bhuul ga.e

kyūñki khaTkā na rahe sab ko udhar jaane kā

aah kyā kyā na usī ḳhaak meñ maqbūl ga.e

apnī nekī o badī chhoḌ ga.e duniyā meñ

garche donoñ na rahe qātil o maqtūl ga.e

zulf meñ us kī bahut rah ke na itrā.īyo dil

mujh se kitne hī mirī jaan yahāñ jhuul ga.e

pahlī bātoñ kā mohabbat kī 'hasan' zikr na kar

bas vo dastūr ga.e aur vo ma.amūl ga.e

yan se paigham jo le kar gae maqul gae

us ki baaton mein lage aise ki sab bhul gae

tu to mashuq hai tujh ko to bahut aashiq hain

gham unhon ka hai jo wo jaan se nirmul gae

be-kali apni ka izhaar to karta nahin main

gul-ruKHan dekh ke tum mujh ko abas bhul gae

kyunki khaTka na rahe sab ko udhar jaane ka

aah kya kya na usi KHak mein maqbul gae

apni neki o badi chhoD gae duniya mein

garche donon na rahe qatil o maqtul gae

zulf mein us ki bahut rah ke na itraiyo dil

mujh se kitne hi meri jaan yahan jhul gae

pahli baaton ka mohabbat ki 'hasan' zikr na kar

bas wo dastur gae aur wo mamul gae