yan to kuchh apni KHushi se nahin hum aae hue

yaañ to kuchh apnī ḳhushī se nahīñ ham aa.e hue

ik zabardast ke haiñ khīñch ke bulvā.e hue

aate hī ro.e to aage ko na roveñ kyūñ-kar

ham to haiñ roz-e-talavvud hī ke dukh paa.e hue

dekh kar ġhair ke saath us ko kahā yuuñ ham ne

ho to tum chāñd par is vaqt ho gahnā.e hue

kal jo gulshan meñ ga.e ham to ajab shakl se aah

hijr ke maare hue jī se ba-tañg aa.e hue

gul jo taaze the khile kahte the shabnam se ye baat

dekh kar un ko jo vo phuul the kumhlā.e hue

aaj haiñ shāḳh pe jis taur se pazhmurda 'nazīr'

kal isī tarah se ham hoveñge murjhā.e hue

yan to kuchh apni KHushi se nahin hum aae hue

ek zabardast ke hain khinch ke bulwae hue

aate hi roe to aage ko na rowen kyun-kar

hum to hain roz-e-talawwud hi ke dukh pae hue

dekh kar ghair ke sath us ko kaha yun hum ne

ho to tum chand par is waqt ho gahnae hue

kal jo gulshan mein gae hum to ajab shakl se aah

hijr ke mare hue ji se ba-tang aae hue

gul jo taze the khile kahte the shabnam se ye baat

dekh kar un ko jo wo phul the kumhlae hue

aaj hain shaKH pe jis taur se pazhmurda 'nazir'

kal isi tarah se hum howenge murjhae hue