yan us gali sa kab koi bustan hai dusra

yaañ us galī sā kab koī bustāñ hai dūsrā

haañ kuchh jo hai to rauza-e-rizvāñ hai dūsrā

har dam ye do adū haiñ pa.e-jān-e-nā-tavāñ

ik dard-e-ishq hai ġham-e-hijrāñ hai dūsrā

hai turfa jān-o-dil kā dam-e-iztirāb haal

rokeñ jo ek ko to gurezāñ hai dūsrā

ā.īna jab vo dekhe to kahtī haiñ chitvaneñ

sach hai ki ham sā kab koī insāñ hai dūsrā

vo ruk ke uTh chalā to use kyūñki rokiye

ik dast hai ba-dil ba-garebāñ hai dūsrā

us ghar ke dar pe jab hue ham ḳhaak tab khulā

darvāza aane jaane ko aur yaañ hai dūsrā

kyā dil jigar kī us kī galī meñ kaheñ ḳhabar

ik mar gayā ik aan kā mehmāñ hai dūsrā

rahiye hamāre dil meñ ki laa.eq tumhāre kab

aisā makāñ ba-kishvar-e-daurāñ hai dūsrā

Tuk suniyo zamzame mire dil ke ki baaġh meñ

kab is tarah kā murġh-e-ḳhush-alhāñ hai dūsrā

hai turfa qismat apnī ki jis jā ho ek dost

vaañ dekhiye to jaan kā ḳhvāhāñ hai dūsrā

ya.anī nashist Thahrī kal us dar pe thī so haa.e

dekhā jo aaj jā ke to darbāñ hai dūsrā

yaktā hai do jahān meñ 'jur.at' alī kī zaat

aisā na koī yaañ na koī vaañ hai dūsrā

yan us gali sa kab koi bustan hai dusra

han kuchh jo hai to rauza-e-rizwan hai dusra

har dam ye do adu hain pae-jaan-e-na-tawan

ek dard-e-ishq hai gham-e-hijran hai dusra

hai turfa jaan-o-dil ka dam-e-iztirab haal

roken jo ek ko to gurezan hai dusra

aaina jab wo dekhe to kahti hain chitwanen

sach hai ki hum sa kab koi insan hai dusra

wo ruk ke uTh chala to use kyunki rokiye

ek dast hai ba-dil ba-gareban hai dusra

us ghar ke dar pe jab hue hum KHak tab khula

darwaza aane jaane ko aur yan hai dusra

kya dil jigar ki us ki gali mein kahen KHabar

ek mar gaya ek aan ka mehman hai dusra

rahiye hamare dil mein ki laeq tumhaare kab

aisa makan ba-kishwar-e-dauran hai dusra

Tuk suniyo zamzame mere dil ke ki bagh mein

kab is tarah ka murgh-e-KHush-alhan hai dusra

hai turfa qismat apni ki jis ja ho ek dost

wan dekhiye to jaan ka KHwahan hai dusra

yani nashist Thahri kal us dar pe thi so hae

dekha jo aaj ja ke to darban hai dusra

yakta hai do jahan mein 'jurat' ali ki zat

aisa na koi yan na koi wan hai dusra