yar aaya hai ahwal-e-dil-e-zar dikhao

yaar aayā hai ahvāl-e-dil-e-zār dikhāo

iisā ko zarā hālat-e-bīmār dikhāo

aa jaao bas ab raah na ai yaar dikhāo

mushtāq huuñ mushtāq huuñ dīdār dikhāo

aalam hai so hai hijr meñ yaañ josh-e-junūñ kā

sahrā mujhe dikhlāo ki gulzār dikhāo

fardā-e-qayāmat kā na iqrār karo jaañ

lo hashr sahī aaj hī dīdār dikhāo

āshiq haiñ bahut ek to chun kar koī mujh sā

pushte kī tarah pusht-ba-dīvār dikhāo

aalam nazar aa jaa.e bahār aur ḳhizāñ kā

ham zard hoñ tum phuul se ruḳhsār dikhāo

talvār lagāo mujhe golī se na maaro

til Dhāñk lo aur abru-e-ḳhamdār dikhāo

har dam mutaqāzī hai yahī hasrat-e-dīdār

phir ek nazar jalva-e-dildār dikhāo

farmāte ho āshiq haiñ mire tujh se hazāroñ

ai jaan ziyāda nahīñ do-chār dikhāo

ishq abrū o mizhgāñ kā buto saath hai dam ke

ḳhanjar mujhe dikhlāo ki talvār dikhāo

maiñ qabr se bhī 'rind' yahī kahtā uThūñgā

mushtāq huuñ mushtāq huuñ dīdār dikhāo

yar aaya hai ahwal-e-dil-e-zar dikhao

isa ko zara haalat-e-bimar dikhao

aa jao bas ab rah na ai yar dikhao

mushtaq hun mushtaq hun didar dikhao

aalam hai so hai hijr mein yan josh-e-junun ka

sahra mujhe dikhlao ki gulzar dikhao

farda-e-qayamat ka na iqrar karo jaan

lo hashr sahi aaj hi didar dikhao

aashiq hain bahut ek to chun kar koi mujh sa

pushte ki tarah pusht-ba-diwar dikhao

aalam nazar aa jae bahaar aur KHizan ka

hum zard hon tum phul se ruKHsar dikhao

talwar lagao mujhe goli se na maro

til Dhank lo aur abru-e-KHamdar dikhao

har dam mutaqazi hai yahi hasrat-e-didar

phir ek nazar jalwa-e-dildar dikhao

farmate ho aashiq hain mere tujh se hazaron

ai jaan ziyaada nahin do-chaar dikhao

ishq abru o mizhgan ka buto sath hai dam ke

KHanjar mujhe dikhlao ki talwar dikhao

main qabr se bhi 'rind' yahi kahta uThunga

mushtaq hun mushtaq hun didar dikhao