yar ka wasl-e-shaba-shab na hua tha so hua

yaar kā vasl-e-shabā-shab na huā thā so huā

sāġhar ishq-e-labā-lab na huā thā so huā

le chukā dil ko vo mujh haath se tab maiñ ne kahā

is qadar terā matālib na huā thā so huā

jaur aur zulm se duniyā meñ ye ḳhūbāñ kā ism

bevafā.ī kā mulaqqab na huā thā so huā

karnā tasḳhīr har ik dil ko do ik bātoñ meñ

is tarah kā bhī ajā.ib na huā thā so huā

roz lagtā hai tire kaan se jā jā ke raqīb

kasū kā itnā marātib na huā thā so huā

ġhairoñ kī bar meñ tire ab to ye kuchh kasrat hai

yā'nī har koī musāhib na huā thā so huā

mehr ustād kī se dekho to is 'nain' ke ta.iiñ

sher kahne kā kabhī Dhab na huā thā so huā

yar ka wasl-e-shaba-shab na hua tha so hua

saghar ishq-e-laba-lab na hua tha so hua

le chuka dil ko wo mujh hath se tab main ne kaha

is qadar tera matalib na hua tha so hua

jaur aur zulm se duniya mein ye KHuban ka ism

bewafai ka mulaqqab na hua tha so hua

karna tasKHir har ek dil ko do ek baaton mein

is tarah ka bhi ajaib na hua tha so hua

roz lagta hai tere kan se ja ja ke raqib

kasu ka itna maraatib na hua tha so hua

ghairon ki bar mein tere ab to ye kuchh kasrat hai

ya'ni har koi musahib na hua tha so hua

mehr ustad ki se dekho to is 'nain' ke tain

sher kahne ka kabhi Dhab na hua tha so hua