yar kahta hai tajalli-e-laqa thi main na tha

yaar kahtā hai tajallī-e-laqā thī maiñ na thā

tūr-e-sīnā par vahī jalva-numā thī maiñ na thā

gumbad-e-aflāk par jis kā huā aksar guzar

vo dil-e-bīmār-e-ġham kī ik duā thī maiñ na thā

har taraf thī ālam-e-imkāñ meñ jo phailī huī

mere asrār-e-haqīqat kī ziyā thī maiñ na thā

misl-e-bū-e-gul tire kūche meñ thā jis kā guzar

ai sanam vo merī jān-e-mubtalā thī maiñ na thā

bostāñ meñ tālib-e-dīdār thī jo aap kī

vo gul-e-nargis kī chashm-e-bā-ziyā thī maiñ na thā

ba.ad-e-murdan qabr meñ mujh ko sulā kar ye kahā

dard thā betābiyāñ thiiñ aur qazā thī maiñ na thā

ik jhalak dikhlā ke apnī kis adā se kah gayā

jis ko dekhā vo bhī shān-e-kibriyā thī maiñ na thā

jis ne chūmā vaqt-e-pāmālī qudūm-e-nāz ko

ḳhūn-e-dil bā-shoḳhī-e-rañg-e-hinā thī maiñ na thā

darguzar kar aa.ine se aap ne moḌā hai muñh

is meñ merī hasrat-e-hairat-fazā thī maiñ na thā

zārī-o-shevan hamārī kab sunī haiñ aap ne

bostāñ meñ bulbul-e-naġhma-sarā thī maiñ na thā

uḌ ke jo pahuñchī sabā ke saath galiyoñ meñ tirī

musht-e-ḳhāk-e-kushta-e-teġh-e-adā thī maiñ na thā

dekh kar un ko jo maiñ fart-e-masarrat se marā

vo lage kahne ki ye us kī qazā thī maiñ na thā

thā maiñ tasvīr-e-ḳhyālī hasti-e-mauhūm meñ

vo bhī shān-e-ishq-e-shāh-e-do-srā thī maiñ na thā

ai 'jamīla' bostān-e-ishq meñ vaqt-e-sahar

nik.hat-e-gul sī jo pahuñchī vo sabā thī maiñ na thā

yar kahta hai tajalli-e-laqa thi main na tha

tur-e-sina par wahi jalwa-numa thi main na tha

gumbad-e-aflak par jis ka hua aksar guzar

wo dil-e-bimar-e-gham ki ek dua thi main na tha

har taraf thi aalam-e-imkan mein jo phaili hui

mere asrar-e-haqiqat ki ziya thi main na tha

misl-e-bu-e-gul tere kuche mein tha jis ka guzar

ai sanam wo meri jaan-e-mubtala thi main na tha

bostan mein talib-e-didar thi jo aap ki

wo gul-e-nargis ki chashm-e-ba-ziya thi main na tha

baad-e-murdan qabr mein mujh ko sula kar ye kaha

dard tha betabiyan thin aur qaza thi main na tha

ek jhalak dikhla ke apni kis ada se kah gaya

jis ko dekha wo bhi shan-e-kibriya thi main na tha

jis ne chuma waqt-e-pamali qudum-e-naz ko

KHun-e-dil ba-shoKHi-e-rang-e-hina thi main na tha

darguzar kar aaine se aap ne moDa hai munh

is mein meri hasrat-e-hairat-faza thi main na tha

zari-o-shewan hamari kab suni hain aap ne

bostan mein bulbul-e-naghma-sara thi main na tha

uD ke jo pahunchi saba ke sath galiyon mein teri

musht-e-KHak-e-kushta-e-tegh-e-ada thi main na tha

dekh kar un ko jo main fart-e-masarrat se mara

wo lage kahne ki ye us ki qaza thi main na tha

tha main taswir-e-KHyali hasti-e-mauhum mein

wo bhi shan-e-ishq-e-shah-e-do-sra thi main na tha

ai 'jamila' bostan-e-ishq mein waqt-e-sahar

nikhat-e-gul si jo pahunchi wo saba thi main na tha