yar ke bin bahaar kya kije

yaar ke bin bahār kyā kiije

gul na hove to ḳhaar kyā kiije

kaam merā to ho chalā āḳhir

ai mire kirdgār kyā kiije

koī vā'da vafā nahīñ kartā

vo taġhāful shi'ār kyā kiije

misl-e-ā.īna ḳhud-numā merā

sab se ho hai do-chār kyā kiije

soz-e-dil merā mujh ko de hai jalā

aah misl-e-chinār kyā kiije

ishq ne kar diyā mujhe majbūr

ab nahīñ iḳhtiyār kyā kiije

misl-e-zulf-e-butāñ fasāna-e-dil

hai tavīl iḳhtisār kyā kiije

guzrī jo dil pe mere ho guzrī

us kā ab ishtihār kyā kiije

dil to gulchīñ hai tere gulshan kā

le ke gul-rū hazār kyā kiije

vo to aatā nahīñ hai mere paas

ai dil-e-be-qarār kyā kiije

be-tarah hai mujhe ye mushkil ishq

sāhab-e-zulfiqār kyā kiije

ai 'jahāñdār' sab jahāñ DhūñDā

na.iiñ kuī ġham-gusār kyā kiije

yar ke bin bahaar kya kije

gul na howe to KHar kya kije

kaam mera to ho chala aaKHir

ai mere kirdgar kya kije

koi wa'da wafa nahin karta

wo taghaful shi'ar kya kije

misl-e-aina KHud-numa mera

sab se ho hai do-chaar kya kije

soz-e-dil mera mujh ko de hai jala

aah misl-e-chinar kya kije

ishq ne kar diya mujhe majbur

ab nahin iKHtiyar kya kije

misl-e-zulf-e-butan fasana-e-dil

hai tawil iKHtisar kya kije

guzri jo dil pe mere ho guzri

us ka ab ishtihaar kya kije

dil to gulchin hai tere gulshan ka

le ke gul-ru hazar kya kije

wo to aata nahin hai mere pas

ai dil-e-be-qarar kya kije

be-tarah hai mujhe ye mushkil ishq

sahab-e-zulfiqar kya kije

ai 'jahandar' sab jahan DhunDa

nain kui gham-gusar kya kije