yar ke ruKH ne kabhi itna na hairan kiya

yaar ke ruḳh ne kabhī itnā na hairāñ kiyā

fikr-e-sar-e-zulf ne jaisā pareshāñ kiyā

aisā kisī se junūñ dast-e-garebāñ na ho

chāk-e-garebāñ kā bhī chaak garebāñ kiyā

kar chukā thā zahr-e-rashk parde meñ kaar apnā lek

teġh-e-judā.ī ne zor kār-e-numāyāñ kiyā

ishq tire haath se tū hī batā kyā kareñ

vasl meñ hairāñ kiyā hijr meñ giryāñ kiyā

aish-o-ġham-e-bāġh-e-dahr vahm hai Tuk gul ko dekh

chaak kiyā tū kahe maiñ kahūñ ḳhandāñ kiyā

us kā charāġh-e-murād rahiyo farozāñ mudām

dāġhoñ se dil ko mere jis ne charāġhāñ kiyā

ishq kī kyā tarbiyat tujh se kahūñ ai 'razā'

aah ko naala kiyā naale ko afġhāñ kiyā

yar ke ruKH ne kabhi itna na hairan kiya

fikr-e-sar-e-zulf ne jaisa pareshan kiya

aisa kisi se junun dast-e-gareban na ho

chaak-e-gareban ka bhi chaak gareban kiya

kar chuka tha zahr-e-rashk parde mein kar apna lek

tegh-e-judai ne zor kar-e-numayan kiya

ishq tere hath se tu hi bata kya karen

wasl mein hairan kiya hijr mein giryan kiya

aish-o-gham-e-bagh-e-dahr wahm hai Tuk gul ko dekh

chaak kiya tu kahe main kahun KHandan kiya

us ka charagh-e-murad rahiyo farozan mudam

daghon se dil ko mere jis ne charaghan kiya

ishq ki kya tarbiyat tujh se kahun ai 'raza'

aah ko nala kiya nale ko afghan kiya