yar KHaif hain mera dard baDha dene se

yaar ḳhā.if haiñ mirā dard baḌhā dene se

aag itnī hai ki bujh jaa.e havā dene se

jaise ham donoñ ke milne pe safar ḳhatm huā

manzileñ bantī haiñ rastoñ ko milā dene se

vus.at-e-zāt-e-makīñ se hai makāñ kī vus.at

dil baḌā hogā tujhe us meñ jagah dene se

barf pighlī to nazar aane lage sabz pahāḌ

aañkh khulne lagī ḳhvāboñ ko bahā dene se

jaise qatre ne utārā ho nadī kā sadqa

kitnā halkā huā dil us ko duā dene se

tere dam se mirī nazreñ mire raste par haiñ

farq paḌtā hai tujhe rah se haTā dene se

ye ri.āyat bhī koī peḌ hī kar saktā thā

rāsta khul gayā ik shāḳh kaTā dene se

yar KHaif hain mera dard baDha dene se

aag itni hai ki bujh jae hawa dene se

jaise hum donon ke milne pe safar KHatm hua

manzilen banti hain raston ko mila dene se

wusat-e-zat-e-makin se hai makan ki wusat

dil baDa hoga tujhe us mein jagah dene se

barf pighli to nazar aane lage sabz pahaD

aankh khulne lagi KHwabon ko baha dene se

jaise qatre ne utara ho nadi ka sadqa

kitna halka hua dil us ko dua dene se

tere dam se meri nazren mere raste par hain

farq paDta hai tujhe rah se haTa dene se

ye riayat bhi koi peD hi kar sakta tha

rasta khul gaya ek shaKH kaTa dene se