yar ki taswir hi dikhla de ai mani mujhe

yaar kī tasvīr hī dikhlā de ai maanī mujhe

kuchh to ho is naza.a kī mushkil meñ āsānī mujhe

uf bhī kar saktā nahīñ ab karvaTeñ lenā kujā

zaḳhm-e-pahlū se hai vo taklīf-e-rūhānī mujhe

zāhid-e-maġhrūr rone par mire hañstā hai kyā

baḳhshvā.egā yahī ashk-e-pashemānī mujhe

dil ko us parda-nashīñ se ġhā.ebāna laag hai

khīñch legā ik-na-ik din jazb-e-rūhānī mujhe

yārab āġhāz-e-mohabbat kā ba-ḳhair anjām ho

dil lagā kar ho rahī hai kyā pashemānī mujhe

lau lagī hai yaar se apnī taraf khīñgā kyā

jalva-e-naqsh-o-nigār-e-ālam-e-fānī mujhe

vahshiyoñ ke vāste qaid-e-libās achchhī nahīñ

zeb detā hai yahī tashrīf-e-uryānī mujhe

josh-e-vahshat meñ zamīñ par paañv paḌhne kā nahīñ

le uḌegī nik.hat-e-gul kī pareshānī mujhe

ḳhaak ho jaane pe bhī mumkin na hogā dastaras

haath malvā.egī terī pāk-dāmānī mujhe

dard kā sāġhar bhī saaqī merī qismat meñ na thā

shauq meñ karnā paḌā āḳhir lahū paanī mujhe

mard-e-jāhil huuñ kujā meñ aur kujā ahl-e-kamāl

'yās' kyā ma.alūm andāz-e-ġhazal-ḳhvānī mujhe

yar ki taswir hi dikhla de ai mani mujhe

kuchh to ho is naza ki mushkil mein aasani mujhe

uf bhi kar sakta nahin ab karwaTen lena kuja

zaKHm-e-pahlu se hai wo taklif-e-ruhani mujhe

zahid-e-maghrur rone par mere hansta hai kya

baKHshwaega yahi ashk-e-pashemani mujhe

dil ko us parda-nashin se ghaebana lag hai

khinch lega ik-na-ik din jazb-e-ruhani mujhe

yarab aaghaz-e-mohabbat ka ba-KHair anjam ho

dil laga kar ho rahi hai kya pashemani mujhe

lau lagi hai yar se apni taraf khinga kya

jalwa-e-naqsh-o-nigar-e-alam-e-fani mujhe

wahshiyon ke waste qaid-e-libas achchhi nahin

zeb deta hai yahi tashrif-e-uryani mujhe

josh-e-wahshat mein zamin par panw paDhne ka nahin

le uDegi nikhat-e-gul ki pareshani mujhe

KHak ho jaane pe bhi mumkin na hoga dastaras

hath malwaegi teri pak-damani mujhe

dard ka saghar bhi saqi meri qismat mein na tha

shauq mein karna paDa aaKHir lahu pani mujhe

mard-e-jahil hun kuja mein aur kuja ahl-e-kamal

'yas' kya malum andaz-e-ghazal-KHwani mujhe