yar ko be-hijab dekha hun

yaar ko be-hijāb dekhā huuñ

maiñ samajhtā huuñ ḳhvāb dekhā huuñ

ye ajab hai ki din kuuñ tārīkī

raat kuuñ āftāb dekhā huuñ

nusḳha-e-husn meñ tire qad kuuñ

misra-e-intiḳhāb dekhā huuñ

kis satī ab umīd-e-lutf rakhūñ

tujh nigah siiñ itaab dekhā huuñ

ab huā sab siiñ fāriġh-ut-tahsīl

be-ḳhudī kī kitāb dekhā huuñ

lashkar-e-ishq jab siiñ aayā hai

mulk-e-dil kuuñ ḳharāb dekhā huuñ

majlis-e-chashm-e-mast saaqī meñ

daur-e-jām-e-sharāb dekhā huuñ

ai 'sirāj' ātish-e-mohabbat meñ

dil kuuñ apne kabāb dekhā huuñ

yar ko be-hijab dekha hun

main samajhta hun KHwab dekha hun

ye ajab hai ki din kun tariki

raat kun aaftab dekha hun

nusKHa-e-husn mein tere qad kun

misra-e-intiKHab dekha hun

kis sati ab umid-e-lutf rakhun

tujh nigah sin itab dekha hun

ab hua sab sin farigh-ut-tahsil

be-KHudi ki kitab dekha hun

lashkar-e-ishq jab sin aaya hai

mulk-e-dil kun KHarab dekha hun

majlis-e-chashm-e-mast saqi mein

daur-e-jam-e-sharab dekha hun

ai 'siraj' aatish-e-mohabbat mein

dil kun apne kabab dekha hun