yar ko maine mujhe yar ne sone na diya

yaar ko maiñ ne mujhe yaar ne sone na diyā

raat bhar tāle-e-be-dār ne sone na diyā

ḳhaak par sang-e-dar-e-yār ne sone na diyā

dhuup meñ sāya-e-dīvār ne sone na diyā

shaam se vasl kī shab aañkh na jhapkī tā-sub.h

shādī-e-daulat-e-dīdār ne sone na diyā

ek shab bulbul-e-betāb ke jaage na nasīb

pahlu-e-gul meñ kabhī ḳhaar ne sone na diyā

raat bhar kī dil-e-betāb ne bāteñ mujh se

ranj-o-mehnat ke giraftār ne sone na diyā

sach hai ġham-ḳhvārī-e-bīmār azāb-e-jāñ hai

tā-dam-e-marg dil-e-zār ne sone na diyā

takiya tak pahlū meñ us gul ne na rakkhā 'ātish'

ġhair ko saath kabhī yaar ne sone na diyā

yar ko main ne mujhe yar ne sone na diya

raat bhar tale-e-be-dar ne sone na diya

KHak par sang-e-dar-e-yar ne sone na diya

dhup mein saya-e-diwar ne sone na diya

sham se wasl ki shab aankh na jhapki ta-subh

shadi-e-daulat-e-didar ne sone na diya

ek shab bulbul-e-betab ke jage na nasib

pahlu-e-gul mein kabhi KHar ne sone na diya

raat bhar ki dil-e-betab ne baaten mujh se

ranj-o-mehnat ke giraftar ne sone na diya

sach hai gham-KHwari-e-bimar azab-e-jaan hai

ta-dam-e-marg dil-e-zar ne sone na diya

takiya tak pahlu mein us gul ne na rakkha 'atish'

ghair ko sath kabhi yar ne sone na diya