یار لوگوں کا محبت میں جو معیار گرا

یار لوگوں کا محبت میں جو معیار گرا

یوں لگا مجھ کو میں خود ہی سر بازار گرا

رکھ دیا یار نے فوراً سے اٹھا کر پھر سے

میری تصویر سے جس وقت بھی وہ ہار گرا

جنگجو اس کے سبھی بھاگ گئے جیسے ہی

کھا کے اک تیر عدو قافلہ سالار گرا

بخت خوابیدہ ازل سے ہے سو اس کی خاطر

اس قدر اشک نہ اے دیدۂ بے دار گرا

مجھ سے بے ننگ سے ملنے کی نہیں کر خواہش

اس قدر خود کو نہ اے صاحب دستار گرا

ایک ناکامی سے گھبرا نہیں کچھ مجھ سے سیکھ

ہار مانی نہیں گرچہ میں لگاتار گرا

عالم ضبط تو دیکھو کہ وہ جب چھوڑ گیا

ایک آنسو بھی نہ اصغرؔ سر رخسار گرا