yar logon ka mohabbat mein jo meyar gira

yaar logoñ kā mohabbat meñ jo me'yār girā

yuuñ lagā mujh ko maiñ ḳhud hī sar-e-bāzār girā

rakh diyā yaar ne fauran se uThā kar phir se

merī tasvīr se jis vaqt bhī vo haar girā

jang-jū us ke sabhī bhaag ga.e jaise hī

khā ke ik tīr-e-'adū qāfila-sālār girā

baḳht ḳhvābīda azal se hai so is kī ḳhātir

is qadar ashk na ai dīda-e-bedār girā

mujh se be-nang se milne kī nahīñ kar ḳhvāhish

is qadar ḳhud ko na ai sāhib-e-dastār girā

ek nākāmī se ghabrā nahīñ kuchh mujh se siikh

haar maanī nahīñ garche maiñ lagātār girā

'ālam-e-zabt to dekho ki vo jab chhoḌ gayā

ek aañsū bhī na 'asġhar' sar-e-ruḳhsār girā

yar logon ka mohabbat mein jo me'yar gira

yun laga mujh ko main KHud hi sar-e-bazar gira

rakh diya yar ne fauran se uTha kar phir se

meri taswir se jis waqt bhi wo haar gira

jang-ju us ke sabhi bhag gae jaise hi

kha ke ek tir-e-'adu qafila-salar gira

baKHt KHwabida azal se hai so is ki KHatir

is qadar ashk na ai dida-e-bedar gira

mujh se be-nang se milne ki nahin kar KHwahish

is qadar KHud ko na ai sahib-e-dastar gira

ek nakaami se ghabra nahin kuchh mujh se sikh

haar mani nahin garche main lagatar gira

'alam-e-zabt to dekho ki wo jab chhoD gaya

ek aansu bhi na 'asghar' sar-e-ruKHsar gira