yar se dast-o-gareban na hua tha so hua

yaar se dast-o-garebāñ na huā thā so huā

kabhī itnā maiñ pashemāñ na huā thā so huā

vāqa.ī jā-e-nadāmat to yahī hai ki kabhū

mujh se jo kaam azīzāñ na huā thā so huā

tujh ko dekhe koī aur us se ḳhafā honā haa.e

kyā karūñ ai dil-e-nādāñ na huā thā so huā

kar ke nazzāra tan-e-sāf kā us ke haihāt

shakl-e-ā.īna jo hairāñ na huā thā so huā

hañste hañste na sunā thā kahīñ ho ḳhāna-ḳharāb

rovo ab dīda-e-giryāñ na huā thā so huā

baal ve bikhre hue dekh ke ruḳh par us ke

kabhū kāfir jo musalmāñ na huā thā so huā

'muntazir' is dil-e-betāb ke hāthoñ shab-e-vasl

kyā kaheñ tum se miyāñ jo na huā thā so huā

yar se dast-o-gareban na hua tha so hua

kabhi itna main pasheman na hua tha so hua

waqai ja-e-nadamat to yahi hai ki kabhu

mujh se jo kaam azizan na hua tha so hua

tujh ko dekhe koi aur us se KHafa hona hae

kya karun ai dil-e-nadan na hua tha so hua

kar ke nazzara tan-e-saf ka us ke haihat

shakl-e-aina jo hairan na hua tha so hua

hanste hanste na suna tha kahin ho KHana-KHarab

rowo ab dida-e-giryan na hua tha so hua

baal we bikhre hue dekh ke ruKH par us ke

kabhu kafir jo musalman na hua tha so hua

'muntazir' is dil-e-betab ke hathon shab-e-wasl

kya kahen tum se miyan jo na hua tha so hua