yar tujhko mera KHayal to hai

yaar tujh ko mirā ḳhayāl to hai

ishq meñ itnī dekh-bhāl to hai

ġham nahīñ gar ḳhushī nahīñ hāsil

furqat-e-dost kā malāl to hai

tujh pe guzrī hai kyā ḳhabar hai mujhe

tere jaisā hī merā haal to hai

merā haamī jahāñ nahīñ to kyā

shukr hai rabb-e-zul-jalāl to hai

hai agar zo.am-e-bartarī tum ko

ye bhī ik sūrat-e-zavāl to hai

mere pahlū meñ tū nahīñ na sahī

mere shāne pe terī shaal to hai

zindagī meñ yahī tamannā thī

dam-e-āḳhir tirā visāl to hai

us kī tamsīl hī nahīñ hai 'asad'

merā mahbūb be-misāl to hai

yar tujh ko mera KHayal to hai

ishq mein itni dekh-bhaal to hai

gham nahin gar KHushi nahin hasil

furqat-e-dost ka malal to hai

tujh pe guzri hai kya KHabar hai mujhe

tere jaisa hi mera haal to hai

mera hami jahan nahin to kya

shukr hai rabb-e-zul-jalal to hai

hai agar zoam-e-bartari tum ko

ye bhi ek surat-e-zawal to hai

mere pahlu mein tu nahin na sahi

mere shane pe teri shaal to hai

zindagi mein yahi tamanna thi

dam-e-aKHir tera visal to hai

us ki tamsil hi nahin hai 'asad'

mera mahbub be-misal to hai