yaran-e-tez-gam se ranjish kahan hai ab

yārān-e-tez-gām se ranjish kahāñ hai ab

manzil pe jā pahuñchne kī ḳhvāhish kahāñ hai ab

zindāñ meñ din bhī raat hī jaisā guzar gayā

ahl-e-junūñ vo pahlī sī shorish kahāñ hai ab

jām-e-sharāb ab to mire sāmne na rakh

āñkhoñ meñ nuur haath meñ jumbish kahāñ hai ab

halqa-ba-gosh koī na ab yaar hai yahāñ

vo roz-o-shab kī dād-o-satā.ish kahāñ hai ab

jiine kā haq jo māñgā to tevar badal ga.e

vo mere muhsinoñ kī navāzish kahāñ hai ab

chehre pe gard-e-umr-e-ravāñ kā zuhūr hai

bāñhoñ ke baale bosoñ kī bārish kahāñ hai ab

ḳhanjar ho yā ki dashna ho yā teġh yā qalam

'aḳhtar' vo aab aur vo burrish kahāñ hai ab

yaran-e-tez-gam se ranjish kahan hai ab

manzil pe ja pahunchne ki KHwahish kahan hai ab

zindan mein din bhi raat hi jaisa guzar gaya

ahl-e-junun wo pahli si shorish kahan hai ab

jam-e-sharab ab to mere samne na rakh

aankhon mein nur hath mein jumbish kahan hai ab

halqa-ba-gosh koi na ab yar hai yahan

wo roz-o-shab ki dad-o-sataish kahan hai ab

jine ka haq jo manga to tewar badal gae

wo mere muhsinon ki nawazish kahan hai ab

chehre pe gard-e-umr-e-rawan ka zuhur hai

banhon ke baale boson ki barish kahan hai ab

KHanjar ho ya ki dashna ho ya tegh ya qalam

'aKHtar' wo aab aur wo burrish kahan hai ab