yaro nahin itna mujhe qatil ne sataya

yaaro nahīñ itnā mujhe qātil ne satāyā

jitnā ki mare dushman-e-jāñ dil ne satāyā

kuchh sarzanish-e-kār kā shākī vo nahīñ hai

majnūñ ko to hai sāhib-e-mahmil ne satāyā

ġhuncha kahūñ yā durj-e-guhar tere dahan ko

khulnā nahīñ is uqda-e-mushkil ne satāyā

ārām se soyā na kamar kā tirī kushta

marqad meñ bhī mūrān-e-tah-e-gil ne satāyā

us kā mujhe shab yaad dilāyā ruḳh-e-pur-nūr

shakl apnī dikhā kar mah-e-kāmil ne satāyā

merā dil-e-saudā-zada kartā na kabhī ġhul

is kākul-e-pechāñ ke salāsil ne satāyā

afyūñ kī kisī roz maiñ khā jā.ūñgā golī

be-vajah ruḳh-e-yār ke gar til ne satāyā

jab bosa maiñ māñgūñ huuñ to kyā kahte ho muñh pher

aisā to kisī bhī nahīñ saa.il ne satāyā

har jā mutajallī hai vo be-parda va-lekin

ġhaflat ke mujhe parda-e-hā.il ne satāyā

thā ek to sayyād giraftār qafas meñ

aur dūsre āvāz-e-anādil ne satāyā

ai ham-safarāñ pesh-ravī kī nahīñ tāqat

kyā kiije hameñ dūri-e-manzil ne satāyā

pahlū meñ 'nasīr' aah nahīñ hai dil-e-muztar

is sher-e-ġham-ālūda-e-be-dil ne satāyā

yaro nahin itna mujhe qatil ne sataya

jitna ki mare dushman-e-jaan dil ne sataya

kuchh sarzanish-e-kar ka shaki wo nahin hai

majnun ko to hai sahib-e-mahmil ne sataya

ghuncha kahun ya durj-e-guhar tere dahan ko

khulna nahin is uqda-e-mushkil ne sataya

aaram se soya na kamar ka teri kushta

marqad mein bhi muran-e-tah-e-gil ne sataya

us ka mujhe shab yaad dilaya ruKH-e-pur-nur

shakl apni dikha kar mah-e-kaamil ne sataya

mera dil-e-sauda-zada karta na kabhi ghul

is kakul-e-pechan ke salasil ne sataya

afyun ki kisi roz main kha jaunga goli

be-wajah ruKH-e-yar ke gar til ne sataya

jab bosa main mangun hun to kya kahte ho munh pher

aisa to kisi bhi nahin sail ne sataya

har ja mutajalli hai wo be-parda wa-lekin

ghaflat ke mujhe parda-e-hail ne sataya

tha ek to sayyaad giraftar qafas mein

aur dusre aawaz-e-anadil ne sataya

ai ham-safaran pesh-rawi ki nahin taqat

kya kije hamein duri-e-manzil ne sataya

pahlu mein 'nasir' aah nahin hai dil-e-muztar

is sher-e-gham-aluda-e-be-dil ne sataya