yas ka bojh uThate hue mar jate hain

yaas kā bojh uThāte hue mar jaate haiñ

log ummīdeñ sajāte hue mar jaate haiñ

ḳhvāhisheñ ziist se lipTī haiñ pishāchoñ kī tarah

ham jinheñ ḳhuun pilāte hue mar jaate haiñ

dhyān meñ jis ke sivā kuchh bhī nahīñ rahtā thā

ab use dhyān meñ laate hue mar jaate haiñ

tū jo iThlā ke raqīboñ se gale miltā hai

ham tirī bazm meñ aate hue mar jaate haiñ

vo bhī kar dete haiñ ik roz ta'alluq ko shahīd

jin ko ham log bachāte hue mar jaate haiñ

rat-jage aañkh kī dahlīz se haTte hī nahīñ

ḳhvāb nīñdoñ ko bulāte hue mar jaate haiñ

kyoñ mareñ ashk bahāte hue ham sahrā meñ

aa.iye peḌ lagāte hue mar jaate haiñ

log farmā.isheñ karte haiñ unhīñ kī 'faisal'

ham jo ash'ār sunāte hue mar jaate haiñ

yas ka bojh uThate hue mar jate hain

log ummiden sajate hue mar jate hain

KHwahishen zist se lipTi hain pishachon ki tarah

hum jinhen KHun pilate hue mar jate hain

dhyan mein jis ke siwa kuchh bhi nahin rahta tha

ab use dhyan mein late hue mar jate hain

tu jo iThla ke raqibon se gale milta hai

hum teri bazm mein aate hue mar jate hain

wo bhi kar dete hain ek roz ta'alluq ko shahid

jin ko hum log bachate hue mar jate hain

rat-jage aankh ki dahliz se haTte hi nahin

KHwab nindon ko bulate hue mar jate hain

kyon maren ashk bahate hue hum sahra mein

aaiye peD lagate hue mar jate hain

log farmaishen karte hain unhin ki 'faisal'

hum jo ash'ar sunate hue mar jate hain