yagangi mein bhi dukh ghairiyat ke sahta hun

yagāngī meñ bhī dukh ġhairiyat ke sahtā huuñ

chaman meñ sabza-e-begāna ban ke rahtā huuñ

tirī nigāh-e-mohabbat kā aasrā pā kar

fasāna-e-sitam-e-rozgār kahtā huuñ

aziim dhāroñ kā ruḳh pherne kā azm liye

haqīr maujoñ pe tinke kī tarah bahtā huuñ

hai apne zarf kā maqsūd imtihāñ shāyad

tire qarīb pahuñch kar bhī duur rahtā huuñ

ḳhud apne se bhī chhupāyā hai muddatoñ jis ko

qarīb aao ki tum se vo baat kahtā huuñ

tumhāre bas meñ nahīñ mere zaḳhm kā marham

maiñ zindagī ke haqā.eq kī choT sahtā huuñ

farāz-e-dār bhī 'hurmat' hai ek manzil auj

koī maqām ho maiñ sar-buland rahtā huuñ

yagangi mein bhi dukh ghairiyat ke sahta hun

chaman mein sabza-e-begana ban ke rahta hun

teri nigah-e-mohabbat ka aasra pa kar

fasana-e-sitam-e-rozgar kahta hun

azim dhaaron ka ruKH pherne ka azm liye

haqir maujon pe tinke ki tarah bahta hun

hai apne zarf ka maqsud imtihan shayad

tere qarib pahunch kar bhi dur rahta hun

KHud apne se bhi chhupaya hai muddaton jis ko

qarib aao ki tum se wo baat kahta hun

tumhaare bas mein nahin mere zaKHm ka marham

main zindagi ke haqaeq ki choT sahta hun

faraaz-e-dar bhi 'hurmat' hai ek manzil auj

koi maqam ho main sar-buland rahta hun