یہاں آغاز اور انجام بدلے جا رہے ہیں

یہاں آغاز اور انجام بدلے جا رہے ہیں

کہ جیسے مے کشوں میں جام بدلے جا رہے ہیں

ترقی اور خوشحالی کے دن بھی اور کیا ہوں

پرانی بستیوں کے نام بدلے جا رہے ہیں

محافظ راہزن ہو اور ظالم پارسا ہو

سنا ہے آدمی کے کام بدلے جا رہے ہیں

نیا مذہب نئی پوجا خدا بھی اب نئے ہوں

صنم خانوں کے سب اصنام بدلے جا رہے ہیں

مطابق اب نہیں شاید ہماری سوچ کے وہ

بزرگوں کے سبھی پیغام بدلے جا رہے ہیں

قبول عام کر لیں آؤ اب اپنی خطائیں

سزا سے غالباً انعام بدلے جا رہے ہیں

برائی کو بھلائی کی سند دے دے کے گوہرؔ

بہ نام حریت ایام بدلے جا رہے ہیں