yahan aaghaz aur anjam badle ja rahe hain

yahāñ āġhāz aur anjām badle jā rahe haiñ

ki jaise mai-kashoñ meñ jaam badle jā rahe haiñ

taraqqī aur ḳhush-hālī ke din bhī aur kyā hoñ

purānī bastiyoñ ke naam badle jā rahe haiñ

muhāfiz rāhzan ho aur zālim pārsā ho

sunā hai aadmī ke kaam badle jā rahe haiñ

nayā maz.hab na.ī puujā ḳhudā bhī ab na.e hoñ

sanam-ḳhānoñ ke sab asnām badle jā rahe haiñ

mutābiq ab nahīñ shāyad hamārī soch ke vo

buzurgoñ ke sabhī paiġhām badle jā rahe haiñ

qubūl-e-‘ām kar leñ aao ab apnī ḳhatā.eñ

sazā se ġhāliban in'ām badle jā rahe haiñ

burā.ī ko bhalā.ī kī sanad de de ke 'gauhar'

ba-nām-e-hurriyat ayyām badle jā rahe haiñ

yahan aaghaz aur anjam badle ja rahe hain

ki jaise mai-kashon mein jam badle ja rahe hain

taraqqi aur KHush-haali ke din bhi aur kya hon

purani bastiyon ke nam badle ja rahe hain

muhafiz rahzan ho aur zalim parsa ho

suna hai aadmi ke kaam badle ja rahe hain

naya mazhab nai puja KHuda bhi ab nae hon

sanam-KHanon ke sab asnam badle ja rahe hain

mutabiq ab nahin shayad hamari soch ke wo

buzurgon ke sabhi paigham badle ja rahe hain

qubul-e-‘am kar len aao ab apni KHataen

saza se ghaaliban in'am badle ja rahe hain

burai ko bhalai ki sanad de de ke 'gauhar'

ba-nam-e-hurriyat ayyam badle ja rahe hain