yahan alag se koi kab hisar mera hai

yahāñ alag se koī kab hisār merā hai

mujhe sameTe hue ḳhud ġhubār merā hai

na chhīn pā.egā mujh se koī nuqūsh-e-ḳhayāl

ye phuul mere haiñ ye shāḳh-sār merā hai

chalūñ to dhuup kā bādal huuñ maiñ ḳhud apnī jagah

rukūñ to har shajar-e-sāyā-dār merā hai

paḌhūñ to naama kisī kā hai chehrā chehrā mujhe

likhūñ to ḳhāma haqīqat-nigār merā hai

jagah na de mujhe palkoñ pe kam nahīñ ye bhī

ki maujzan tirī āñkhoñ meñ pyaar merā hai

hisār bāñdh le mujh meñ kahā udāsī ne

koī na aa.e yahāñ ye hisār merā hai

na jaane kab se yahāñ muntazir thā maiñ ai 'yās'

ḳhabar jab aa.ī vahāñ intizār merā hai

yahan alag se koi kab hisar mera hai

mujhe sameTe hue KHud ghubar mera hai

na chhin paega mujh se koi nuqush-e-KHayal

ye phul mere hain ye shaKH-sar mera hai

chalun to dhup ka baadal hun main KHud apni jagah

rukun to har shajar-e-saya-dar mera hai

paDhun to nama kisi ka hai chehra chehra mujhe

likhun to KHama haqiqat-nigar mera hai

jagah na de mujhe palkon pe kam nahin ye bhi

ki maujzan teri aankhon mein pyar mera hai

hisar bandh le mujh mein kaha udasi ne

koi na aae yahan ye hisar mera hai

na jaane kab se yahan muntazir tha main ai 'yas'

KHabar jab aai wahan intizar mera hai