yahan baghair-fughan shab basar nahin hoti

yahāñ baġhair-fuġhāñ shab basar nahīñ hotī

vahāñ asar nahīñ hotā ḳhabar nahīñ hotī

ḳhalish jigar meñ hai dil ko ḳhabar nahīñ hotī

chubhī hai phāñs idhar se udhar nahīñ hotī

abas hī kal ke liye iltivā-e-mashq-e-ḳhirām

qayāmat aaj hī kyuuñ fitna-gar nahīñ hotī

jo un se duur hai us ke liye haiñ chashm-e-ba-rāh

ham un ke paas haiñ ham par nazar nahīñ hotī

ajal ko rokiye kyā kah ke un ke aane tak

ki ab to baat bhī ai chāra-gar nahīñ hotī

vo aa ga.e haiñ to aañsū zarūr poñchheñge

ab aañkh kyuuñ mirī ashkoñ se tar nahīñ hotī

kamāl-e-be-hunarī se ġhanī huuñ maiñ 'ahsan'

mujhe zarūrat-e-arz-e-hunar nahīñ hotī

yahan baghair-fughan shab basar nahin hoti

wahan asar nahin hota KHabar nahin hoti

KHalish jigar mein hai dil ko KHabar nahin hoti

chubhi hai phans idhar se udhar nahin hoti

abas hi kal ke liye iltiwa-e-mashq-e-KHiram

qayamat aaj hi kyun fitna-gar nahin hoti

jo un se dur hai us ke liye hain chashm-e-ba-rah

hum un ke pas hain hum par nazar nahin hoti

ajal ko rokiye kya kah ke un ke aane tak

ki ab to baat bhi ai chaara-gar nahin hoti

wo aa gae hain to aansu zarur ponchhenge

ab aankh kyun meri ashkon se tar nahin hoti

kamal-e-be-hunari se ghani hun main 'ahsan'

mujhe zarurat-e-arz-e-hunar nahin hoti