yahan ishq mast-e-alast hai yahan shakl kya yahan nam kya

yahāñ ishq mast-e-alast hai yahāñ shakl kyā yahāñ naam kyā

ye jahān-e-mauj-e-ḳhayāl hai yahāñ aql-o-fikr se kaam kyā

rah-e-ishq kī ye tajalliyāñ yahāñ gum hue ka.ī kārvāñ

ka.ī pech-o-ḳham haiñ yahāñ vahāñ kisī jā pe koī qiyām kyā

jahāñ harf-o-ma.anī haiñ sab ġhalat vahāñ mudda.ā nahīñ mudda.ā

jahāñ guftugū bhī harām ho vahāñ iztirāb-e-kalām kyā

yahī mai-kada hai vo mai-kada jahāñ qatra-qatra surūr hai

ye maqām-e-kaif-e-nigāh hai yahāñ raqs-e-bāda-o-jām kyā

ye hijāb-e-lā ye vajūd-e-lā yahāñ har nishān hai be-nishāñ

yahāñ kam haiñ aql-o-shu.ūr sab yahāñ āgahī kā maqām kyā

na haram se us ko koī ġharaz na hī dair se koī vāsta

jo ġhulām yaar kā ho gayā'' vo bhalā kisī kā ġhulām kyā

ye jahān-e-ishq hai be-ḳhabar yahāñ kā.enāt-e-ḳhudī kahāñ

nahīñ jab maqām-e-ḳhabar koī to payām kyā to salām kyā

yahan ishq mast-e-alast hai yahan shakl kya yahan nam kya

ye jahan-e-mauj-e-KHayal hai yahan aql-o-fikr se kaam kya

rah-e-ishq ki ye tajalliyan yahan gum hue kai karwan

kai pech-o-KHam hain yahan wahan kisi ja pe koi qiyam kya

jahan harf-o-mani hain sab ghalat wahan muddaa nahin muddaa

jahan guftugu bhi haram ho wahan iztirab-e-kalam kya

yahi mai-kada hai wo mai-kada jahan qatra-qatra surur hai

ye maqam-e-kaif-e-nigah hai yahan raqs-e-baada-o-jam kya

ye hijab-e-la ye wajud-e-la yahan har nishan hai be-nishan

yahan kam hain aql-o-shuur sab yahan aagahi ka maqam kya

na haram se us ko koi gharaz na hi dair se koi wasta

jo ghulam yar ka ho gaya wo bhala kisi ka ghulam kya

ye jahan-e-ishq hai be-KHabar yahan kaenat-e-KHudi kahan

nahin jab maqam-e-KHabar koi to payam kya to salam kya