yahan jaza-o-saza ka kuchh etibar nahin

yahāñ jazā-o-sazā kā kuchh e'tibār nahīñ

fareb-e-hadd-e-nazar hai urūj-e-dār nahīñ

nigāh-e-lutf meñ ġham kā mire shumār nahīñ

ye e'tibār ba-andāz-e-e'tibār nahīñ

sukūn maut hī anjām-e-iztirāb-e-firāq

jise qarār na aa.e vo be-qarār nahīñ

ḳhabar nahīñ ki khile kitne phuul gulshan meñ

ki aaj jaib-o-garebāñ meñ ek taar nahīñ

ḳhudā ke naam pe dil ko sipurd-e-ishq kiyā

ab is ke ba.ad umīd-e-ma.āl-e-kār nahīñ

do ātisha na sahī dard hī sahī saaqī

jo un meñ farq kare kuchh vo bāda-ḳhvār nahīñ

ab us ko aa ke bujhā.e koī to ham jāneñ

ye dāġh-e-dil hai charāġh-e-sar-e-mazār nahīñ

rahīn-e-aish hai ḳhū-karda-e-tamannā hai

vo bāda-ḳhvār jo sar-gashta-e-ḳhumār nahīñ

zamāna ghuum rahā hai mirī nigāhoñ meñ

mujhe qarār nahīñ to kahīñ qarār nahīñ

na jā na jā kabhī us gulshan-e-tarab meñ na jā

junūñ kā naam jahāñ mausam-e-bahār nahīñ

zamāna merī tabāhī pe jaan de detā

maiñ ḳhud hī apnī tabāhī kā sogvār nahīñ

karishma-shāzī-e-nairañg-e-husn kyā kahiye

hazāroñ ahd haiñ aur koī ustuvār nahīñ

shab-e-firāq meñ andāz-e-hashr hai 'shaukat'

ab is ke ba.ad qayāmat kā intizār nahīñ

yahan jaza-o-saza ka kuchh e'tibar nahin

fareb-e-hadd-e-nazar hai uruj-e-dar nahin

nigah-e-lutf mein gham ka mere shumar nahin

ye e'tibar ba-andaz-e-e'tibar nahin

sukun maut hi anjam-e-iztirab-e-firaq

jise qarar na aae wo be-qarar nahin

KHabar nahin ki khile kitne phul gulshan mein

ki aaj jaib-o-gareban mein ek tar nahin

KHuda ke nam pe dil ko sipurd-e-ishq kiya

ab is ke baad umid-e-maal-e-kar nahin

do aatisha na sahi dard hi sahi saqi

jo un mein farq kare kuchh wo baada-KHwar nahin

ab us ko aa ke bujhae koi to hum jaanen

ye dagh-e-dil hai charagh-e-sar-e-mazar nahin

rahin-e-aish hai KHu-karda-e-tamanna hai

wo baada-KHwar jo sar-gashta-e-KHumar nahin

zamana ghum raha hai meri nigahon mein

mujhe qarar nahin to kahin qarar nahin

na ja na ja kabhi us gulshan-e-tarab mein na ja

junun ka nam jahan mausam-e-bahaar nahin

zamana meri tabahi pe jaan de deta

main KHud hi apni tabahi ka sogwar nahin

karishma-shazi-e-nairang-e-husn kya kahiye

hazaron ahd hain aur koi ustuwar nahin

shab-e-firaq mein andaz-e-hashr hai 'shaukat'

ab is ke baad qayamat ka intizar nahin